ಬಚ್ಚಿಟ್ಟ ಹಂಬಲಗಳು ಬೆನ್ನಟ್ಟಿವೆ
ತೆರೆಬಾರದ ತೀರದಲ್ಲಿ ಮೂಡಿದ ಹೆಜ್ಜೆ ಗುರುತೊಂದು
ಮಾಯವಾಗಿದೆ ತಂತಾನೆ
ತಿಳಿದೋ ತಿಳಿಯದೆಯೋ ನಾನು ಸಮಾಧಿಯಾಗಿದ್ದೇನೆ
ಕಳೆದುಹೋದ ಹೆಜ್ಜೆಗಳ ಹುಡುಕಾಟದಲ್ಲಿ
ಬೆಂಕಿ ತಗುಲಿದ ಭಾವನೆಯ ಗೊಂಚಲಿಗೆ
ನೀರ ಚಿಮುಕಿಸುವ ತೃಣ ಪ್ರಯತ್ನ ನನ್ನದು
ಗೆಜ್ಜೆನಾದದ ಹೆಜ್ಜೆಗಧುಡುಕಾಟದಲ್ಲಿ ನಾನು.................

ಮೊಹಬತ್ತಿನ ಗುಲ್ಮೊಹರ್ ಅರಳುವ ಸಮಯ
ಬಾಡಿಹೋದ ಮನ ನಳನಳಿಸುವ ಸಮಯ
ದಾರಿ ಬದಿಯ ಗುಲ್ಮೊಹರ್ ಕೇಳುತ್ತಿದೆ
ಏನಾಗಿದೆ ನಿನಗಿಂದು
ನನಗೂ ನಿಜವೆನಿಸಿದೆ ಅದರ ಮಾತೇ
ಗುಲ್ಲುಗುಲ್ಲಾಗಿರೊ ನನ್ನ ಮನಸೊಳು ಗುಲ್ಮೊಹರ್ ಹೂ
ಅರಳೀತೇ

ಕನಸುಗಳ ಲೊಕದಲ್ಲಿ ವಿಹರಿಸುತ್ತ
ನಕ್ಷತ್ರಗಳೊಂದಿಗೆ ನಲುಗುತ್ತ
ಚಂದಿರನೊಂದಿಗೆ ಹರಟುತ್ತ
ಸಾಗೋಣ ಬಾ ದೂರ ದೂರ

ಕನಸುಗಳಿಗೆ ಕಾವಲಿರು ನೀನು
ದೋಚಬಹುದು ಯಾರಾದರೂ
ಕನಸೆಂದರೆ ಕೇವಲ ಕನಸುಗಳಲ್ಲ
ಸುಪ್ತಮನಸಿನ ಭಾವಗಳು
ಮೂಕಮನದ ನೂರು ರಾಗಗಳು
ಕಲ್ಪನೆಯ ಕಾವ್ಯ ಕುಸುಮಗಳವು ಜೋಪಾನ