ಹೊಸ ಚೈತನ್ಯ ಮೂಡಿದೆ ಮನಸಲ್ಲಿ
ನಸುನಗು ಮೂಡಿದೆ ಮೊಗದಲ್ಲಿ
ಕಣ್ಣಿಗೆ ಕನಸಕಾಣುವುದೊಂದೇ ಕೆಲಸ
ಬೇರೇನೂ ತೋಚುತಿಲ್ಲ ಮನಕೆ
ನನ್ನ ಮನಸು ನನ್ನೊಳಿಲ್ಲ
ಎಂದೊ ಕೇಳಿದ ಹಾಡಿಗೆ ಈಗ ತಾಳ ಹಾಕುತ್ತಿರುವೆ
ನನ್ನವನ ದನಿಯೇ ಹಿಮ್ಮೇಳ
ಅವನುಸಿರೇ ಸಂಗೀತ
ನಮ್ಮೊಲವೇ ನೂತನ ಪ್ರೇಮ ಕಾವ್ಯ
ಇದಕೆ ಬೇಕಿಲ್ಲ ಯಾವುದೂ ಶ್ರುತಿ ಲಯ

ಮನದ ಮೂಲೆಯಲ್ಲಿ ಬಚ್ಚಿಟ್ಟ ಹಂಬಲಗಳ ಬೆನ್ನಟ್ಟಿ
ಹೊರಟಿರುವೆ ನಾನು
ಜೊತೆಬರುವೆಯೇನು ನೀನು
ಬರುವೆಯಾದರೆ ಬಾ
ಇಬ್ಬರೂ ಜೊತೆ ಸಾಗೋಣ
ಬಚ್ಚಿಟ್ಟ ಹಂಬಲಕ್ಕೆ ನೀರೆರೆದು
ನಿನಗೆ ನಾನು ನನಗೆ ನೀನಾಗಿ
ಭವಿಷ್ಯದ ನವ ಕನಸೊಂದ ಹೆಣೆಯೋಣ
ನನ್ನುಸಿರು ನೀನಾಗಿ ನಿನ್ನೊಲವು ನಾನಾಗಿ
ಸಾಗೋಣ ದೂರ ದೂರ

ಎದೆಯಾಳದಲ್ಲಿ ಮೂಡಿದ ಈ ಭಾವಕ್ಕೆ
ಹೆಸರಿಡ ಹೊರಟ ನನಗೆ ನಾನಾರೆಂದು ತಿಳಿಯುತಿಲ್ಲ
ಆದರೂ ತಿಳಿಯುವ ಪ್ರಯತ್ನದಲ್ಲಿದ್ದೇನೆ
ಅದ್ಯಾವಾಗ ನಾ ನನ್ನ ಮನಸ ಅರಿವೆನೋ
ಅವನೂ ಹಾಗೆ ಅರ್ಥವಾಗದ ಕವಿತೆ
ಬಣ್ಣಿಸಲಾಗದ ಕಾಮನಬಿಲ್ಲು
ನನ್ನ ಮನಸಿನ ಚಿಪ್ಪಲ್ಲಿ ಮುತ್ತಾದ ಮಳೆಹನಿ
ಮನದ ಮಾಮರಕೆ ಇಂಚರವಾದ ಕೋಗಿಲೆ